ပညာရှိဇီးကွက်ကြီးက
လေထဲမှာလိုက်
တိုက်တလုံးပြီးတလုံး
ဆောက်ပြတယ်။
ကုလားအုပ်တကောင်က
သံကန္တာရခေါင်ခေါင်မှာ
နေရာယူခြင်းသင်ခန်းစာ
ပိုပိုသာသာ ကျင့်သုံးဆဲ။
ဝါးပင်တသိုက်က
စည်းချက်အလိုက်
ယိမ်းအကပဲ
တိုက်မြဲတိုက်နေကြဆဲ။
မြေခွေးတကောင်က
သူ့မျက်နှာပေါ်မှာ
မတော်တရော်မျက်နှာဖုံးနဲ့
ပြုံးလို့….
ဘူစွာတယောက်
ပေသီးတဂျောက်ဂျောက်နဲ့
သူ့ရဲ့လက်ထောက်
တောက်တဲ့နဲ့ တစ်တီတူး
သံစုံကြူးလို့
မြူးလို့….။
ပုတ်သင်ညိုတအုပ်
ချောင်မှာကုပ်
သူ့အလုပ်သူသိ
ရေမြေအနေအထားကြည့်။
နယ်ရုပ်လေးတွေဟာ၊
စစ်တုရင်ခုံပေါ်မှာ
ရိုးရိုးသားသား
ဘုတ်တလုတ် တောက်တဲ့ ကစား။
ကွင်းပြင်ပြားပြား က
ထန်းပင် အားအား
မိုးကြိုးသွားနဲ့ ဆိုင်ကလုံး
ငုံးတိုတိုကြီးမဖြစ်ရေး
အမလေး….. ဘလေး……..။
ကျီးတကောင်
ရွှေဒေါင်းတောင်တသန်း
မျက်နှာပန်းကိုလှလို့……။
ခွပ်ဒေါင်းမောင်
အတောင်တွေကျွတ်
ထိုးခွပ်ဖို့ အခွင့်မသာ…….။
ရွက်ဆုပ်ပြက္ခဒိန်ရဲ့ စာမျက်မှာများ
နေ့ရက်တွေကိုက်စား
သေဆုံးသွားတဲ့အခါ
အားလုံး အားလုံးဟာ
သူ့နေရာနဲ့ သူ့နေရာ
သူ့နေရာနဲ့ သူ့နေရာ
ထိန်လင်း
၉. ၇. ၉၀
Leikum (လေခွန်း)
Subscribe to:
Post Comments (Atom)
No comments:
Post a Comment